ਸ਼੍ਰੀ ਗੁਰੂ ਹਰਕ੍ਰਿਸ਼ਨ ਸਾਹਿਬ ਜੀ ਦੇ ਚਰਨਾਂ ਵਿੱਚ ਅਰਦਾਸ ੴ ਵਾਹਿਗੁਰੂ ਜੀ ਕਾ ਖਾਲਸਾ, ਵਾਹਿਗੁਰੂ ਜੀ ਕੀ ਫਤਿਹ॥ ਹੇ ਦੀਨ ਦਿਆਲ, ਅੰਤਰਜਾਮੀ, ਬਾਲਾ ਪ੍ਰੀਤਮ ਧੰਨ-ਧੰਨ ਸ਼੍ਰੀ ਗੁਰੂ ਹਰਕ੍ਰਿਸ਼ਨ ਸਾਹਿਬ ਜੀ ਮਹਾਰਾਜ! ਆਪ ਜੀ ਦੇ ਪਾਵਨ ਚਰਨ-ਕਮਲਾਂ ਵਿੱਚ ਕੋਟਿ-ਕੋਟਿ ਪ੍ਰਣਾਮ ਅਤੇ ਨਿਮਰਤਾ ਸਹਿਤ ਬੇਨਤੀ ਹੈ। ਹੇ ਸੱਚੇ ਪਾਤਸ਼ਾਹ! ਆਪ ਜੀ ਤਾਂ ਆਪ ਕਿਰਪਾ ਦੇ ਸਾਗਰ ਹੋ, ਜਿਨ੍ਹਾਂ ਦੇ ਦਰਸ਼ਨ ਕੀਤਿਆਂ ਹੀ ਜੀਵਾਂ ਦੇ ਸਾਰੇ ਦੁੱਖ-ਦਰਦ ਮਿਟ ਜਾਂਦੇ ਹਨ। ਇਸ ਵਕਤ ਮਨ ਅਤੇ ਤਨ ਦੁੱਖਾਂ, ਚਿੰਤਾਵਾਂ ਅਤੇ ਮੁਸ਼ਕਿਲਾਂ ਨਾਲ ਘਿਰਿਆ ਹੋਇਆ ਹੈ। ਕੋਈ ਹੋਰ ਓਟ-ਆਸਰਾ ਨਜ਼ਰ ਨਹੀਂ ਆਉਂਦਾ, ਇਸ ਲਈ ਆਪ ਜੀ ਦੇ ਦਰ ‘ਤੇ ਝੋਲੀ ਅੱਡੀ ਹੈ। ਹੇ ਕਿਰਪਾਲੂ ਗੁਰੂਦੇਵ! ਸਾਡੇ ਸਿਰ ‘ਤੇ ਆਪਣਾ ਮਿਹਰ ਭਰਿਆ ਹੱਥ ਰੱਖੋ। ਸਾਡੇ ਪਰਿਵਾਰ ਅਤੇ ਜੀਵਨ ਵਿੱਚੋਂ ਸਾਰੇ ਸਰੀਰਕ ਰੋਗ, ਮਾਨਸਿਕ ਕਲੇਸ਼, ਤੰਗੀਆਂ ਅਤੇ ਦੁੱਖਾਂ-ਤਕਲੀਫ਼ਾਂ ਦਾ ਨਾਸ ਕਰ ਦਿਓ। ਸਾਨੂੰ ਇਸ ਮੁਸ਼ਕਿਲ ਘੜੀ ਵਿੱਚੋਂ ਨਿਕਲਣ ਦਾ ਬਲ ਅਤੇ ਚੜ੍ਹਦੀ ਕਲਾ ਬਖਸ਼ੋ। ਜਿਵੇਂ ਆਪ ਜੀ ਨੇ ਦਿੱਲੀ ਵਿਖੇ ਦੁਖੀ ਅਤੇ ਬਿਮਾਰ ਲੋਕਾਂ ਨੂੰ ਆਪਣੀ ਰਹਿਮਤ ਦੀ ਦ੍ਰਿਸ਼ਟੀ ਨਾਲ ਰੋਗ-ਮੁਕਤ ਕੀਤਾ ਸੀ, ਉਵੇਂ ਹੀ ਸਾਡੇ ‘ਤੇ ਵੀ ਆਪਣੀ ਮਿਹਰ ਦੀ ਨਜ਼ਰ ਕਰੋ। ਸਾਡੇ ਹਿਰਦੇ ਵਿੱਚ ਨਾਮ-ਸਿਮਰਨ ਦਾ ਵਾਸਾ ਕਰ ਦਿਓ, ਤਾਂ ਜੋ ਮਨ ਨੂੰ ਸ਼ਾਂਤੀ ਤੇ ਧੀਰਜ ਮਿਲ ਸਕੇ। ਆਪ ਜੀ ਦੇ ਪਾਵਨ ਸਰੂਪ ਦਾ ਧਿਆਨ ਧਰਦਿਆਂ ਅਸੀਂ ਇਹੀ ਜੋਦੜੀ ਕਰਦੇ ਹਾਂ:“ਸ੍ਰੀ ਹਰਿਕ੍ਰਿਸਨ ਧਿਆਈਐ ਜਿਸੁ ਡਿਠੇ ਸਭਿ ਦੁਖਿ ਜਾਇ ॥” ਹੇ ਪਾਤਸ਼ਾਹ! ਅਣਜਾਣ ਬੱਚੇ ਸਮਝ ਕੇ ਸਾਡੇ ਗੁਨਾਹਾਂ ਤੇ ਭੁੱਲਾਂ-ਚੁੱਕਾਂ ਨੂੰ ਬਖਸ਼ ਲੈਣਾ ਅਤੇ ਆਪਣੀ ਚਰਨ ਸ਼ਰਨ ਵਿੱਚ ਰੱਖ ਕੇ ਜੀਵਨ ਸੁਖਾਲਾ ਕਰਨਾ।ਵਾਹਿਗੁਰੂ ਜੀ ਕਾ ਖਾਲਸਾ, ਵਾਹਿਗੁਰੂ ਜੀ ਕੀ ਫਤਿਹ॥
